Lalaki milayat sa taytayan atol sa Pasko, patay

Cebu, Philippines — Patay ang usa ka wala hiilhing lalaking gikatahong milayat sa Mandaue- Mactan Bridge ala-6 pasado ang takna sa gabii sa adlaw sa Pasko Disyembre 25, 2020.

Si Police Captain Alcon Escosora, hepe sa Presinto 3 sa Lapu-Lapu City Police Office miingon nga ang maong lalaki gibanabana nga anaa na sa 30 ngadto sa 40 ang panuigon

Nagsul-ob kini og karsones nga itom ug adunay patik sa dughan nga “Jesus is my Lord,” dakoon ang panglawas ug itomon ang pamanit.  Dugang pa ni Escosora nga ang ilang mga polis nga nagbantay sa tiilan sa taytayan habig sa Barangay Pajo gipahibalo sa mga motorista bahin lalaking milayat gikan sa taytayan.

Ang maong mga polis mitawag dayon sa PNP Maritime Police aron pagkuha sa maong lalaki. Dali nila kining gidala sa Lapu-Lapu City  Hospital apan ang mga doktor medeklarar nga dead on arrival.

Ang kapolisan nanawagan sa mga banay nga nawad-an og miyembro sa pamilya sa pagduaw sa ilang buhatan aron masusi ang maong patay’ng lawas. (BANAT NEWS)