Nangaangol sa pabuto, bala pagsugat sa pasko

Cebu, Philippines — Misaka ngadto og 25 porsiyento ang gidaghanon sa mga naangol tungod sa pabuto ug bala sa pagsaulog sa Pasko karong tuiga sumala pa sa Department of Health Central Visayas base sa alas-12 sa udto adlaw nga Sabado nilang natala.

Sa tuig 2019 aduna lamang upat ka kaso ang nabuthan apan karon tuiga lima ka mga tawo ang nabuthan ug dunay usa nga naigo sa bala human usa ka hubog nga nagmaoy ang nibunal sa iyang armas.

Base sa talaan sa DOH-7, ang mga nabuthan gikan sa Cebu City- usa; Lapu-Lapu City-tulo; Bohol- usa ug Negros Oriental-usa.

Ang mga naglambigit nga pabuto nga hinungdan sa ilang pagkaangol mao ang rebintador-usa; triangle-usa; Bongalo-usa; kwitis-usa; Picollo-usa; ug .22 caliber nga bala -usa.

Kasagaran sa mga naapektahang parte sa lawas mao ang kamot-tulo; mata-usa; ulo-usa ug batiis-usa.

Matud pa nga ang mga naangol nabuthan diha sa kadalanan-upat; balay-usa ug ang uban -usa.

Sa pikas bahin, walay natalang nabiktima sa paggamit og paboto sa Dakbayan sa Mandaue sanglit mituman ang mga tawo nga dili na mogamit og pabuto.

Kay inay nga pabuto, nagpalanogay ang mga managsilingan sa ilang mga sound systems ug videoke.

Wala usab migamit og torotot ang mga bata tungod sa awhag sa Department of Health (DOH) nga kuyaw sa pagtakod sa coronavirus disease 2019 ang paggamit og tototot sanglit pinaagi man sa pagtayhop ang pagpatingog niini. – Romeo T.  Limpangog ( BANAT NEWS)