“Third Bridge” madelatar pagkompleto

Cebu, Philippines — Malangan pa ang pagsumpay sa Cebu-Cordova Link Expressway (CCLEX) o gibansagan sa mga Cebuano nga “Third Bridge” nga tulo ka tuig ng gibuhat sukad sa groundbreaking ceremony niini tungod sa epekto sa coronavirus pandemic.

Gipahibalo ni Allan Alfon, presidente ug general manager sa Cebu-Cordova Link Expressway Corporation (CCLEC) sa The Freeman (igsuong pamantalaan sa Banat News) nga ang ‘main bridge deck’ sa taytayan makompleto karon pang Disyembre 2021 inay sa eskedyul nga Agusto 2021.

“This COVID hit us all admittedly. We are forced to extend to December 2021 as CCLEX’s substantial completion,” matud ni Alfon.

Matud niya matawag kining “substantial completion” kun makompleto na og taud ang main bridge deck apan dili pa gyud maagian sanglit duna pay kinahanglang siguraduhon nga luwas kining gamiton.

Gibasol ni Alfon ang pandemiya tungod naapektahan niini ang ilang supply chain, work lockdown o nihinay ang pagtrabaho matag dunay trabahante silang gidudahang nataptan sa virus, hasta ang mga langyaw nga empleyadong espesyalista sa konstruksyon nalangan sab sa pag-anhi sa Sugbu tungod sa gihapon sa pandemiya.

Hinuon gipanglantawan niya nga maagian na ang maong taytayan sa Pebrero o ba kaha sa Marso sa tuig 2022.

Si Alfon midugang nga ang orihinal nga budget nga P30 bilyones posibleng madugangan og P1 bilyon tungod aning pandemiya. “Yes ni increase sad. It’s given man kay these are costs which we never knew and budgeted for it. Probably additional P1 billion. The original budget is P30 billion,” dugang pa niya.

Ang CCLEC mipahibalo nga sa pagkakaron nahuman na nila ang piling works sa 8.5-kilometrong taytayan.

Sa uwahing pamahayag nga giluwatan sa CCLEC niadtong Nobiyembre giingon nga  ang overall engineering, procurement, and construction (EPC) progress sa CCLEX naa na sa 64.98 percent samtang ang konstruksyon 54.52 percent.

Giingong namuntar na ang walo ka kable sa Towers 1 ug 2 samtang ang mga pylons (haligi) sa mismong taytayan hapit na sab mahuman og kongkreto.

“We have also started the installation of the cross on top of the pylons. The cross, one of the iconic features of CCLEX, will be 40 meters tall and lighted on all four sides at night. It symbolizes Cebu’s significant role as cradle of Chrsitianity. The concreting of the portal frame that crosses above the CSCR viaduct has been completed,” sumala pa sa ilang pamahayag.

Ang CCLEX dunay two lanes kada direksyon aron maagian og 50 mil ka sakyanan kada adlaw nga makapaluag sa trapiko sa Marcelo Fernan Bridge  ug sa Mandaue-Mactan Bridge.

Gidesinyo kini alang sa mga sakyanan nga makapadagan hangtud 80 kilometros kada oras ug may gihabugon nga 51 metros gikan sa dagat aron makasuong bisan dagkong mga barko.

Ang groundbreaking sa maong taytayan nga nanukad sa lungsod sa Cordova gipangunahan ni Pres. Rodrigo Duterte niadtong Marso 2, 2017. (BANAT NEWS)