42 ka menor de edad na-rescue sa kapolisan

Cebu, Philippines — Niabot ngadto sa 42 ka menor de edad nga nagpangedaron og 15-anyos paubos kinsa nitambong sa Misa de Gallo diha sa nagkalain-laing simbahan sa Dakbayan sa Sugbo ang na-rescue sa kapolisan.

Sa maong gidaghanon 27 niini lalaki ug 15 ang babaye.

Ang maong mga menor gipahimutang diha sa holding area sa Tejero gym ug gipaubos og seminar kalabot sa safety ug health protocols.

Human sa seminar ang maong mga menor ihatud dayon sila sa tagsa-tagsa nila ka pinuy-anan.

Sayo pa, nipahimagno na ang hepe sa Prevention ,Restoration , Order, Beautification and Enhancement (PROBE) Team Raquel Arce ngadto sa mga ginikanan nga kinahanglan gyud nga motuman sa  Executive Order (EO) No. 111 nga nagdili sa mga menor 15-anyos paubos ug 65-anyos pataas sa paggawas.

Sayo pa, ang siyudad nipakatap kini og Koushiong bus diha sa gawas sa mga simhanan nga maoy masakyan sa i-rescue nga mga menor de edad.

Sa laing bahin, mo-deploy og dugang personnel ang kagamhanan sa siyudad ugma atol sa kataposang adlaw sa Misa de Gallo aron masiguro ang istriktong pagpatuman sa health protocols.

Si Konsehal Joel Garganera, deputy chief implementer sa Emergency Operations Center sa siyudad nagkanayon nga gituohan nila nga mas modaghan pa ang mga tawo sa gawas sa simbahan atol sa bisperas sa pasko.

Ang mga security personnel maoy mosiguro nga ang mga manimbahay mosunod  sa safety protocols.

Giawhag ni Garganera ang mga menor de edad ug senior citizen nga magpabilin nalang sa ilang panimalay ug maminaw nalang sa live streaming sa Misa de Gallo. – Rowena D. Capistrano (BANAT NEWS)