Taytayan nga magkonektar sa Cordova ug Cebu malangan

Cebu, Philippines — Gipahibalo ni Cebu City Mayor Edgardo Labella kagahapon nga tungod sa pandemiya medyo malangan ang pagporma sa taytayan nga magkonektar sa Munisipyo sa Cordova ug Dakbayan sa Sugbo.

Nasaryran nga ang orihinal nga target niini sa Agosto 2021 apan tungod sa kakulian nga nahatag sa pandemiya posibleng maporma na kini sa Disyembre 2021.

Matud ni Labella nga usa kini sa nahisgotan sa gitambongan niya nga tigom sa Cebu Cordova Link Expressway Corporation (CCLEC) kinsa maoy nag-umol sa maong proyekto.

Matud usab ni Labella nga naa na sa 60 porsyento ang construction niini.

Sayo pa, si Labella nagkanayon nga dako kaayo og matabang ang maong proyekto dali na unya ang pagbisita diha sa Lungsod sa Cordova ug sa tupad nga lugar niini nga mao ang Lapu-Lapu City.

Giingong ang maong taytayan makatabang usab kini sa pagkamenos sa trapiko sa pipila ka dapit sa siyudad.

Tipik usab kini sa pagsuporta sa “Build, Build, Build” program nga makatampo sa economic development nga gitingoha sa administrasyon ni Presidente Rodrigo Duterte.

Ang CCLEC usa ka subsidiary sa Metro Pacific Tollways Corp. (MPTC).(BANAT NEWS)