Labella mihangyo sa tanan dili mokumpiyansa

Cebu, Philippines — Gipasabot ni Cebu City Mayor Edgardo Labella nga ang Cebu City dili na gyud unta magkinahanglan og quarantine pass tungod kay gipaubos naman sa Modified General Community Quarantine (MGCQ) apan aron malimitahan ang mga tawo sa gawas gipatuman ang odd-even scheme sa quarantine passes.

Apan karong temporaryo na sab gisuspenso ang paggamit niini aron paghatag og dalan sa Simbang Gabi ug Misa de Gallo gihangyo sa Mayor ang katawhan nga magmatngon kanunay, dili mokompiyansa ug i-obserbar ang basic health protocols ilabi na panahon sa Pasko ug Bag-ong Tuig.

Nanghinaot ang mayor nga unta dili abusaran sa mga tawo ang kagawasan nga gihatag sa ilaha.

“Hangyoon ko kamo atong gi-suspend ang implementation sa Quarantine pass para kamong tanan makahigayon sa pag-simba so dili unta ni nato abusuhan kung human sa misa uli nalang kamo sa balay ug wa na gyuy laing tuyo unless essential gyud kaayo para atong mapatunhay ang atong flattening of the curve, ang atong maayo kaayo karon nga quarantine situation,” hangyo ni Labella. Si Konsehal Dave Tumulak sa iyang bahin miasoy naobserbahan niya sa mga malls sa siyudad nga nagkaanam og daghan ang mga tawo ilabi na karon nga gisuspenso ang paggamit sa quarantine pass.

Sigon sa konsehal timan-an kanunay sa tawo ang pag-obserbar sa physical distancing kun pananglitan mosuroy man aron malikayan nga adto sa tambalanan mag-pasko tungod kay naigo sa COVID-19.

Samtang si Cebu City Police Office Director Colonel Josefino Ligan miasoy nga ipatuman nila ang maximum tolerance karong panahona. Kadto lang magmagahi gyud ug di mopatuo ilahang kasohan og disobedience sa article 151 sa Revised Penal Code.

“Pero kung mahimo pasabton tungod kay Pasko kinahanglan sila magmalipayon pud ug sakto lang sa pag-estorya para gyud mapasabot nila nga i-mentinar ang minimum health protocols,” sigon ni Col. Ligan.

Kagahapon sa buntag gihimo ang sendoff ceremony sa mga polis nga i-deploy aron mobantay sa kahapsay ug kalinaw sa siyudad sa Sugbo atol sa Simbang Gabi ug Misa de Gallo. Ang kapolisan abagan sa mga sakop sa PROBE, CESET ug Task Force Kasaligan.

Si Ligan dili lang pagpatuman sa minimum health protocols ang ipatuman sa Simbang Gabi ug Misa de Gallo apan tutukan sab nila ilang anti-criminality activity sanglit apan man ang mga barangay sa ilang tutokan aron masiguro nga wala’y dautang tawo nga mopahimulos sa higayon. “Kining sendoff ceremony atong gipangayo ang pangaliya sa Kahitas-an nga kitang tanan safe during sa period nga magbantay ta sa Misa de Gallo. Ang atoang slogan permanente for the City of Cebu and for all the security force until the pandemic is around the security force together with the government of Cebu and atoang slogan will always be “We work as one. We fight as one and We heal as one,” ni Ligan pa.

Si Mayor Labella nagpasalamat sa tanan ug nanghinaot nga ang kadasig nga ilang gipakita magpadayon hantod nga mahuman ang 9-novena.

Nagpasalamat sab ang Mayor sa serbisyo nga gihatag sa tanan ug kini mitataw nga dili niya kini makalimtan.