Mag bisiklita nga dili magsul-ob og helmet pamultahon

CEBU, Philippines — Dakpon na ang mga magbisiklita sa Dakbayan sa Mandaue nga dili magsul-ob og helmet, ingon man reflectorized vest ug pamultahon.                            

Kini human naaprobahan ang ordinansa nga gipangamahanan ni Konsehal Jimmy Lumapas nga maoy chairman sa committee on transportation sa konseho sa dakbayan atol sa sesyon niadtong Nobiyembre 11, 2020 ug gipirmahan ni Mayor Jonas Cortes niadtong Disyembre 7, 2020.                                  

“Kini atong gihimo sa pagsuporta nato sa mga bike enthusiasts ug ingon man sa mga moadto sa trabaho aron sila safety,” nagkanayon si Konsehal Lumapas.                             

 Gilatid nga lagda sa maong ordinansa ang seklista kinahanglan nga magsul-ob og helmet ug reflectorized vest o bright- colored vest sa matag sakay nila sa ilang bisiklita.                          

Nalatid usab sa lagda nga kinahanglan kanunay nga magkupot ang duha ka kamot sa manobela gawas lamang niadtong mga person with disability o (PWD’s)                                        

Gidili usab sa ordinansa ang pagpaangkas ug gitugot lamang ang minimal nga karga sa giluwanan nga bisiklita.                             

Dugang nga gidili mao pag-counterflow ug ingon man ang paggawas sa pagsubay sa bicycle lane.                                

Ang madakpan nga walay helmet, blinkers, reflectorized vest ug ang mo-counterflow ang makabayad og multa nga P50 ug ang dili pagsubay sa bicycle lane P100.

Apan kadtong dili makabayad mohimo sila og community service nga usa ka oras sa opisina sa Traffic Enforcement Agency of Mandaue (TEAM) nga nahimutang sa Sitio Tribunal sa Barangay Centro sa maong dakbayan. — MEL (BANATNEWS)