Pagsulbad sa baha sa Mambaling underpass gisugdan

CEBU, Philippines — Gisugdan na ang clearing operation sa kilid sa underpass sa Natalio Bacalso Avenue diha sa Barangay Mambaling nga pirmeng lunopan sa kun mobunok ang uwan ug dili na hinuon maagian sa mga sakyanan.

Ang clearing kinahanglang himuon aron mapatuman ang road widening ug konstruksyon sa drainage system nga makaapektar sa maong underpass.

Si Konsehal Jerry Guardo, chairman sa Committee on Infrastructure sa konseho miingon nga kani nga proyekto maoy gituohan nilang makasulbad sa problema sa baha sa maong lugar. Ang siyudad naproblema na og maayo niini tungod sa baha. Nagpatabang na ang siyudad sa Department of Public Works and Highways (DPWH)-7 nga maoy nagpasiugda sa pagtukod sa maong underpass.

“Mao man gud nay problema diha na una ang civil works nauwahi ang drainage component.  So, apil na siya karon kani sa widening included na ang drainage project, hopefully that will help solve sa flooding concern dihang dapita,” sigon ni Guardo.

Ang konsehal miingon nga na-identify na ang mga kabalayan nga maapektuhan sa clearing operation. Hinuon wala makasinati og problema ang siyudad sa mga tag-iya sa mga luna naapektahan human nga sila gipasabot sa kamahinungdanon sa proyekto ug nakauyon ra sab sila sa presyo.

Moabot sa 40 ka mga imprastraktura ang matud pa apektado niini. —IBM (BANATNEWS)