Maestra gipatay sa bana

Cebu, Philippines — Patay ang usa ka maestra human siya gikatahong gidunggab sa iyang bana atol sa ilang panaglalis diha sa ilang panimalay sa Sitio Nangka, Barangay San Roque, Dakbayan sa Talisay kagahapon sa hapon.

Ang magtiayon parehong  42-anyos. Ang bana nakit-an nalang sab nga wala nay kinabuhi sa luyong bahin sa ilang balay nga dunay hikot nga alambre sa liog niini.

Gitago sa Banat News ang pangalan sa duha aron protihian ang nag-inusara nilang anak. Sa inisyal nga imbestigasyon sa kapulisan nasuta nga daan nang adunay panagbangi ang magtiayon.  Adunay mga estorya sa silingan nga katapusan nila nga lalis mao ang labhonon nga wa pa malabhi.

Si Police Major Gerard Ace Pelare, pangu sa Talisay City Police Station  miingon nga nisangpot sa pagpanunggab ang panaglalis sa duha.

Ang biktima nga nasamdan na nianang tungora nidagan sa gawas sa ilang pinuy-anan apan wa kini makagawas tungod kay gikandado sa suspetsado.

Giguba nalang sa mga tawo ang gate nga ginama sa puthaw aron matabang ang samarong biktima ug gidala sa tambalanan apan pagabot didto nakabsan kini sa kinabuhi.

Ang naginusara nga anak sa duha milayat gikan sa ikaduhang andana sa ilang panimay padung sa atop sa ilang silingan.

Sa pagabot sa mga polis, nakit-an sab nga patay na ang bana sa luyong bahin sa balay. Gidudahan sa kapolisan nga naghikog kini human sa nabuhat sa asawa.

Nakuha sa crime scene ang 12- pulgadang kutsilyo nga gituohang gigamit sa pagpatay sa ginang.

Apan aduna sab uban nga silingan nga niingon nga dili tungod sa labhonon ang giawayan sa managtiayon. Matud pa nila nagsige na og away ang duha apan dili lang nila panumbalingon.

Gikaingon nga nagtrabaho kaniadto sa usa ka food company ang bana apan gipaundang sa asawa tungod kay dali magalgal sa bisyo sa iyang mga kauban. ( BANAT NEWS)