Carbon Public Market nangandam pagdagsa sa mga tawo

CEBU, Philippines — Basta magsingabot na gani ang Pasko, gipaabot usab ang pagdagsa sa mga mangumprahay sa Carbon Public Market, ang kinadak-ang merkado sa Cebu City ug sa tibuok Sugbo. Gipaabot nga modagsa gyud ang mga tawo sa maong merkado nunot sa nagsingabot nga kapaskohan.

Si Cebu City Market Authority  head, Irvin Cabales mipasalig nga hamugaway ang pagsulod sa Carbon gumikan gipahimangnoan na ang vendors nga dili gyud molapas sa ilang mga puwesto aron dili maghuot ang mga tawo.

Estrikto sab ang pagpatuman sa social distancing busa lapad nga monitoring ang ilang gibuhat. Gani ang mga polis sa Carbon Police Station kanunay nga nagpatrolya ug nanakop ni bisan kinsang wala magtarong og suot sa ilang facemask.

Gipatuman sa merkado ang palisiya nga “No Quarantine Pass, No Entry” ug sa 10 ka mga satellite market sa Siyudad sa Sugbo isip pamaagi nga dili magdasok ang mga tawo.

Regular sab ang pag-disinfect sa kamerkadohan ug gipatuman ang one entrance ug exit. Ang Carbon Market gilangkoban sa 1,500 ka stalls ug dunay kapin sa 2,500 ka ambulant vendors. —IBM (BANATNEWS)