Guidelines sa Misa De Gallo gilatid na sa LGUs

Cebu, Philippines — Gihan-ay na sa mga lokal nga kagamhanan ang mga lagda sa pagpahigayon sa misa de gallo aron masunod ang health ug safety protocols paglikay sa COVID-19.

Lakip na niini ang Dakbayan sa Talisay diin gitugutan na ni Mayor Gerald Anthony “Samsam” Gullas Jr. ang pagpahigayon sa misa de Gallo ug ang paggamit sa mga basketball court aron sa pagmentenar sa social distancing.

Subay niini gisugdan na sa pagsuroy sa kapulisan sa Talisay ang mga simbahan aron sa pag inspeksyon labot sa ipatuman nga lagda.

Si Police Major Gerard Ace Pelare, pangu sa Talisay City Police Station niingon nga tahas nila mao ang hapsay nga pagpatuman sa safety ug health protocols.

Niadtong miaging adlaw si Mayor Gullas nakigtigom sa kadagkuan sa mga simbahan, mga kapitan ug kapulisan labot sa mga guidelines nga ipasunod sa mga manimbahay.

Gisabotan nga sa Disyembre 15 sugdan ang anticipated mass sa alas 7 sa gabii samtang duha ka misa ang ipahigayon sa Disyembre 16 nga sugdan sa alas 3 sa kadlawon ug ang sunod alas 4:30 sa kadlawon.

Gibawal sab ang pagpahigayon og misa de gallo sa mga kapilya aron dili malapas ang mga guidelines. ( BANAT NEWS)