33 ka brgy sa Probinsiya sa Sugbo gibahaan

CEBU, Philippines — Nikabat sa 33 ka barangay gikan sa unom ka lungsod ug dakbayan sa Probinsiya sa Sugbo ang nakasinati og baha kagahapon tungod sa sunod-sunod nga pag-ulan.

Base sa situation report sa Provincial Disaster Risk Reduction and Management Office (PDDRMO) nga 13 ka barangay ang naapektohan sa Lungsod sa Tuburan nga gilangkuban sa Colonia, Fortaleza, Sangi, Jagbuaya, Manga, Otso, Caridad, Marmol, Mag-atubang, Mag-Alwa, Mag-Antoy, Amatugan ug Languyon,

Nasayran nga kutob sa liog ang gilawmon sa baha sa Barangay Colonia human niawas ang Caridad River hinuon walay natala nga namatay o grabeng kadaot sa maong hitabo.

Sa Siyudad sa Danao, pito ka barangay ang nabahaan lakip niini ang Ogis, Guinacot, Poblacion, Taboc, Taytay ug Suba ug 30 ka pamilya ang gipabakwit.

Samtang sa Lungsod sa Balamban nakasinati og baha ang Barangay Nangka ug Cantood human usab niawas ang Balamban River.

Nikabat sa 200 ka mga nibakwit ang anaa karon sa Nangka Covered Court ug Balamban Central Elementary School.

Matud ni Mayor Alex Binghay nga natanggong siya sulod sa lima ka oras sa baha diha sa Barangay Nangka kagahapon.

Hinuon walay natala usab nga namatay o grabeng kadaot sa lungsod.

Sa Lungsod sa Compostela, ang Barangay Estaca ug Dapdap ang gibahaan samtang sa Lungsod sa Asturias, ang Barangay Owak, Sta. Lucia, Labangon, Lunas ug Bago ang nabahaan human niawas ang Sangi River diin 80 ka indibidwal ang nibakwit. Subay niini, sa oras niining pagsuwat sa balita nagpadayon ang search and rescue operation sa usa ka taga Dakbayan sa Danao kinsa na-missing human naanod sa baha.

Ang kapolisan sa siyudad nakadawat og taho kagahapon sa buntag kabahin sa usa ka lalaki nga nagmaneho sa iyang motor ug naanod sa baha samtang padulong kini sa Barangay Ogis bukiran nga bahin sa Danao.

Ang Rescue 211 adunay gipabakwit nga 30 ka pamilya gikan sa Barangay Taboc.

Sa laing bahin, ang mga nagpuyo diha daplin sa sapa ug kadagatan sa Dakbayan sa Talisay ang gipasidan-ang nga magpabinantayon ilabi na niini pagsige og uwan-uwan tungod kay nabantayan nga nisaka ang tubig sa sapa. —Rowena D. Capistrano, Gabriel C. Bonjoc/BDB (BANATNEWS)