P13 milyones butane canisters sakmit sa NBI

CEBU, Philippines — Gibana-bana nga nikabat ngadto sa P13 milyones nga kantidad sa mga butane canister nga nasakmit sa National Bureau of Investigation (NBI)-7 niadtong Martes sa gabii diha sa Siyudad sa Talisay.

Ang maong mga canister nasakmit kini gikan sa tulo ka illegal refilling station sa Barangay Jaclupan, Tabunok ug Cansojong diin siyam ka tawo ang nasikop.

Matud ni NBI-7 agent Agapito Guirran nga nakadawat sila og reklamo gikan sa usa ka pribadong establisamento kinsa nanag-iya og lehitimo nga refilling station sa butane.

Giingong ang nag-operate sa mga ilegal nga refilling station kanhi customer sa complainant kinsa wala na mag-refill kaniya tungod kay nagtukod na og kaugalingong refilling station nga ilegal.

"Naghimo ni sila og illegal trading sa mga butane canister then naghimo pod sila og backyard refilling which is in violation sa DOE (Department of Energy)", ni Guirran pa.

Matud ni Guiran nga delikado ang backyard refilling tungod posible kining hinungdan sa sunog o explosion.

Sa maong operasyon dala sa mga sakop sa NBI-7 ang search warrant  nga giisyu ni Regional Trial Court (RTC) Judge Ramon Daomila sa Branch 11. —BDB (BANATNEWS)