Cebu City ug Mandaue nakigtagbo sa opisyales ug kaparian

CEBU, Philippines — Si Mayor Edgardo Labella sa Dakbayan sa Sugbo nipatawag og tigom kagahapon sa hapon sa mga sakop sa Parish Pastoral Security Group, Emergency Operation Center, Cebu City Police Office, Prevention Restoration Orderly Beautification Enhancement, Association of Barangay Council ug uban pa aron tukion ang mga plano kalabutan sa umaabot nga Misa de Gallo.

Matud ni Labella nga gituki nila atol sa tigom ang mga angayang buhaton ilabi na ang gipatuman nga curfew sa siyudad ug ang oras sa mga misa tungod kay ang matag simbahan dili pareha og oras sa pagpahigayon og Misa de Gallo.

Gituki usab nila ang paagi aron matuman ang health protocols.

Matud usab ni Labella nga ang Misa de Gallo anha lang kini ipahigayon sa mga simbahan ug walay ipahigayon diha sa mga kapilya.

Sa laing bahin, gikatakda nga makigtagbo si Mayor Junard Ahong Chan sa kaparian diha sa nagkadaiyang simbahang Katoliko sa Dakbayan sa Lapu-Lapu karong adlawa.  Matud ni Chan nga mosugyot siya nga ang Misa de Gallo sa mga simbahan sa siyudad ipahigayon lang kini matag alas 5:00 sa buntag dili alas 3:00 sa kadlawon nga maoy naandang oras.

Sa maong oras nga isugyot ni Chan dili makalapas niini sa curfew sa siyudad ang mga manimbahay.

Nasayran nga ang Department of Health (DOH)-7 niawhag sa mga lokal nga opisyal nga limitahan ang gidaghanon  sa mga tawo nga motambong sa misa diha sa sulod sa simbahan ug motuman sa health protocols. –Romeo T. Limpangog/BDB (BANATNEWS)