Deadline sa pagbayad og buhis sa Talisay giuswag sa Marso
CEBU, Philippines — Giuswag sa konseho sa Dakbayan sa Talisay ang deadline alang sa pagbayad sa mga buhis.
Si Konsehal Richard Jones “Ricky” Aznar maoy nangamahan sa resolusyon aron kahatagan og higayon ang mga negosyante sa pagbayad sa ilang mga buhis.
Matud ni Aznar nga imbes sa buwan sa Enero ang deadline ilaha kining giuswag ngadto sa Marso 29, 2021 alang sa mga renewal.
Si Aznar nagkanayon nga gilugakan kini nila tungod sa nahitabo nga pandemiya diin ang tanan naapektohan.
Ug gumikan sa kalisod sa sitwasyon karon naapektohan usab ang koleksiyon sa buhis sa siyudad. “Para makaginhawa og diyotay atong mga businessman ug uban natong katawhan sa Talisay”, matud ni Aznar.
Si Aznar nihangyo sa wala pa makabayad og buhis nga lihokon na kini aron adunay masulod nga pundo sa panudlanan sa siyudad nga magamit sa mga proyekto. –BDB (BANATNEWS)
- Latest
