Misa de Gallo madayon, kaduha himuon – Palma

CEBU, Philippines — Gipahibalo ni Archbishop Jose Palma sa Archidocese of Cebu nga dunay mahitabong Misa de Gallo alang sa pagsugat sa Pasko, apan kini himuon sulod sa duha ka misa aron tanan makatambong tungod sa gipatumang physical distancing gumikan sa pandemiya sa Covid-19.

Si Palma mitug-an sa Banat News nga madayon ang Misa de Gallo ug kini himuon alas-4 ug alas-5 sa kaadlawon.

Sumala pa ni Palma gikinahanglan kining buhaton sanglit mao kini ang preparasyon sa Pasko. Gitawag sab kini nga nobenaryo alang nga himuon siyam ka adlaw sa dili pa ang Pasko sa Disyembre 25.

Matud niya kini himuon diha sa mga dagko nga simbahan ug sa gymnasium  aron masiguro nga masunod ang social distancing ug mga health protocols sa mga manimbahay.

Giawhag sa arsobispo nga kutob sa mahimo dili kini ipahigayon sa mga kapilya tungod kay gagmay ang lugar ug maghuot ang mga tawo. GImandoan ni Palma ang mga kaparian ug katawhan ang makig-alayon sa ilang Local Government Units alang sa pagpahigayon sa misa de gallo.

Tungod sab sa sitwasyon karon, dili na mahinayon ang iyang planong pangulohan ang Misa de Gallo sa siyam ka mga karaang simbahan sa Sugbo.

Mao man unta kini ang plano nga pahaom sab sa plano sa pagsaulog sa ika-500 ka tuig nga Kristiyanismo sa Pilipinas nga mahitabo sa sunod tuig.

Apan alang kang Cebu City Councilor Phillip Zafra kinsa maoy chairman sa peace and order sa konseho sa siyudad ug unang gitugyanan ni Mayor Edgar Labella sa pakig-alayon sa simbahan alang sa pagpatoman sa health protocols mas pabor kun ipaagi sa online ang misa de gallo.

Si Presidential spokesperson Harry Roque sa sayo pa mitug-an nga gitugyan na ngadto sa local government units ang paghukom kun itugot nila ang pagpahigayon og Misa de Gallo. —Sanden Anadia/IBM (BANATNEWS)