Kataposang hugna sa Pagsangyaw 2021 ilusad sa simbahan

CEBU, Philippines — Katapusan nga bahin sa Pagsangyaw 2021 subay sa kasaulogan sa 500 years sa Christianity sa nasud ilusad karong adlawa Domingo.

Ang Season 6 nga nagtuki kabahin sa Sakramento sa Bunyag maoy katapusan nga hugna sa Pagsangyaw 2021 nga gipangulohan sa Commission on the Laity sa Archdiocese of Cebu ni Fe Mantuhac- Barino uban ni Archbishop Jose Palma.

Matud pa ni Barino, ang season 6 sugdan sa unang domingo sa adbento Nobiyembre 29 ug taposon sa Domingo sa dili pa ang kasaulogan sa ika- 500 years sa tuig sa unang bunyag karong umaabot nga April 14, 2021. Sumala pa ni Barino mahinungdanon kaayo ang pagtuki ug pagpamalandong niining maong pagtuo sa kabililhon sa bunyag ilabi na kanatong mga kristyanos. Ang Arsobispo sa sugbo niawhag sa tanan ilabi na sa mga lugar nga iyang maadtoan ug sa mga kaparian nga iyang matigum nga moapil sa maong kalihukan sa Pagsangyaw 2021 ilabi na magtuki kini kabahin sa bunyag. Dugang pa sa Arsobispo, ang bunyag maoy foundation sa tanan nga blessing nga madawat, hinungdan angayan sundan ang maong pagsangyaw.

Gitug-an ni Palma, ang Pagsangyaw 2021, maayo pagkahan-ay ug pag-andam ni Fr. Marvin Mejia.— MEL (BANATNEWS)