Pasko sa V. Rama mahinayon gihapon
CEBU, Philippines — Bisan pa man sa pandemiya sa Covid-19, mahinayon gihapon ang tinuig nga Pasko sa V. Rama 2020 nga ilusad karong Disyembre 1 diha sa Espina Compound ning siyudad.
Matud ni Jojo Lingaolingao, Project Director sa Pasko sa V. Rama 2020 mao na kini ang ika-25 ka tuig nga gihimo ang Pasko Sa V. Rama ug nagdala kini og tema nga “Sa Pagtuo, Pasko Magpadayon.”
Ang nagpasiugda niini mao ang Rotary Club of Cebu Guadalupe pinaagi sab sa pakig-alayon sa Buhing Pasko Association Inc. ug Cebu City Government. Ang Pasko Sa V. Rama dunay budget nga dul-an sa tunga sa milyon ka pesos.
Gigamit ang maong pundo alang sa tarpaulin, gamiton sa launching ceremonies/parade sama sa lights and sounds, packed meal, t-shirt; diha sab gikuha ang pundo alang sa premyo sa Belen Decoration Contest ug uban pang contests, judging expenses ingon man sa awarding ceremonies.
Sa Belen Decoration Contest ang premyo nila P20,000 sa first prize, P15,000 sa second prize, P10,000 sa third prize, P8,000 sa fourth prize, P5,000 sa fifth prize ug P1,000 ang consolation prizes.
Ang lantern contest dunay premyo nga P15,000 sa first prize, P10,000 sa second prize, P5,000 sa third prize ug P1,000 consolation prizes. Makadawat sab og P3,000 ang first prize sa Best House Décor, P2,000 sa second prize ug P1,000 sa third prize.
Sa Establishment Decoration Contest ang first prize makadawat og P2,800; P1,700 sa second prize ug P1,200 ang third prize. Ang Christmas Tree Special Awards P2,000 ang first prize; P1,500 ang second prize ug P1,000 ang third prize.
Nasayran ang awarding ceremony mahitabo karong January 8, 2021 diin limitado lang gihapon ang makatambong sa maong mga kalihukan.
Si Vice Mayor Michael Rama miasoy nga wala ray kausaban sa Pasko Sa V. Rama ug kini mitataw nga sundon lang gihapon nila ang basic health protocols ilabi na nga nag-atubang kita karon og pandemya. —IBM (BANAT NEWS)
- Latest
