Balik Pasada Program application hub kutob lang karong adlawa

CEBU, Philippines — Gipahibawo ni Konsehal James Anthony Cuenco, chairman sa Cebu City Jeepney Task Force nga kutob nalang karong adlawa ang Balik Pasada Program One-Stop Traditional Public Utility Jeepney application hub.

Nasayran nga adunay ingon niini nga programa ang kagamhanan sa siyudad pinaagi sa pakig-alayon sa Land Transportation Office(LTO)-7 ug Land Transportation Franchising and Regulatory Board(LTFRB)-7 diin gihimo kini aron makabalik sa pagbihaye ang traditional jeepneys.

Si Cuenco nagkanayon nga duha ka semana na nila kini nga gihimo ug ang mga personnel sa ubang ahensiya sa gobiyerno aduna pay laing trabahuon diha sa ubang local government units hinungdan nga ang one-stop shop kutob nalang karon.

Giklaro ni Cuenco nga kadtong gusto gihapong moapas sa inspection ang naandan nga mga proseso maoy ilang sundon.

“By next week the others who still want to catch up, moapas, didto na sila sa old procedure, tagsa-tagsa sila adto, adto ka’g LTO, adto ka’g LTFRB, din-a ma-accommodate sa usa ka lugar because it’s really taking a toll on our resources”, ni Cuenco pa.

Nanghinaot si Cuenco nga ang mga operator ug drayber mopahimulos sa nahibilin nga adlaw aron ipasusi ang ilahang mga TPUJ units.

Sayo pa, ang 1,300 ka traditional jeepneys ang i-evaluate sa Cebu City Jeepney Task Force apan matud ni Cuenco nga naa lang sa 30 persyento ang nagpa-inspection ug sa maong gidaghanon anaa lang sa 15 ngadto sa 20 prosyento ang nakapasar.

“Lets say mga 30 percent who underwent all those screening process, out of 30 percent mao to 15 to 20 percent ang nakapasar, rough figure”, dugang ni Cuenco. —BDB (BANAT NEWS)