Kadaghanan sa gidakop way quarantine passes

CEBU, Philippines — Kadaghanan sa mga nangadakpang quarantine violators walay bitbit nga quarantine pass base sa listahan sa Prevention Restoration Order Beautification Enhancement sa Dakbayan sa Sugbo.

Ang pangulo sa PROBE Team Raquel Arce miingon nga dili momenus 30 ka tawo kada adlaw nga way quarantine passes ang ilang matala sukad nga gimando sa mayor ang paghigpit pagbalik sa pagpangita niini sa mga tawong mogawas sa panimalay.

Si Mayor Edgardo Labella mimando nga pahugtan ang implementasyon sa health and safety protocols subay sa pagsaka sa kaso sa Covid-19. Gitug-an Arce, bisan og ubos pa sa Modified General Community Quarantine ang siyudad gikinahanglan pa gihapon ang quarantine pass sa mga mogawas sa ilang panimalay.

Kadtong madakpan pamultahon, kadtong way ikabayad mag community service sulod sa walo ka oras diha sa Pasil Fish Market.

Sa laing bahin, upat ka tawo nga nagtigbakay ang nasikop sa mga tinugyanan sa Daanbantayan Police Station samtang duha ang nakaeskapo sa may Barangay Agujo sa mao gihapong lungsod.

Ang nadakpan naila nga sila Leonides Santonille, Panfilo Bronola, Marcial Diamos ug Rodrido Abad, mga residente sa maong lugar Nangulo sa maong operation mao ang hepe sa Daanbantayan Police Station nga si Police Captain Ian Macatangay uban sa mga ginsakopan niini. —IBM (BANATNEWS)