Duha nadakpan sa credit card scam, masterminds gipangita sa NBI-7

CEBU, Philippines — Gipangita karon sa National Bureau of Investigation sa Central Visayas (NBI-7) ang duha ka indibidwal nga giingong maoy mastermind sa pagpangawat gamit ang credit cardS.

Giila sa NBI-7 ang duha nga sila Jimboy Ramos ug Juliet Bayato. Sila gipasanginlan nga maoy mastermind sa pagkuha sa credit card information gikan sa usa ka 53-anyos nga magpapatigayon sa Siyudad sa Sugbo aron pagpalit sa mga tambal o medisina gikan sa usa ka networking group nga namaligya og health and wellness nga produkto.

Una niini, dunay duh aka tawong gidakop ang NBI-7 sa gihimo nga entrapment operation niadtong Nobiyembre 20, 2020. Ang duha nga giingong nalambigit sa maong scam mao sila si Roland Ebrado ug Niza Cagabhion kinsa nihimakak sa pasangil batok kanila.

Matud pa sa duha gisugo ra sa ilang amo nga si Ramos nga mokuha sa parcel sa produkto nga gipalit gamit ang credit card sa biktima.

Si Ebrado ug Cagabhion nagtrabaho kang Ramos nga matod pa nanag-iya og parmasya diha sa may B. Rodriguez Street.  Sumala sa biktima nga moabot sa P62, 000 ang nakuha sa iyang credit card gikan sa duha ka managlaing transaksyon.

Nakadawat siya og pipila ka mensahe gikan sa banko nga ni-issue sa iyang credit card nga nag notify kalabot sa mga transaksyon.

Sumala sa NBI nga na trace nila ang transakyon human nga gihatag sa ilaha sa banko ang impormasyon sa biktima kalabot sa dili otorisado nga transaksyon.

“The firm was cooperative which led us to Ramos whom we believed connived with Bayato in doing this illegal transaction,” sumala sa NBI.

Ang mga suspek pasakaan og kasong paglapas sa Republic Act (RA) No. 8484 ang Access Devices Regulation Act as amended by RA 11449.

Ang NBI-7 niawhag kini sa publiko nga magbantay sa pag transact sa ilang mga credit cards hilabina sa mga pampubliko nga lugar.— IBM (BANATNEWS)