TPUJs gikan sa silingang lungsod, tun-an kun pasudlon sa Cebu City
CEBU, Philippines — Tun-an pa sulod sa duha ka semana sa dakbayan sa Sugbo kun kinahanglan na ba nga pasudlon sa siyudad ang mga tradisyonal nga PUJs gikan sa mga silingang lungsod aron makapamasahero.
Si Konsehal James Anthony Cuenco, chairman sa Cebu City Jeepney Task Force miingon nga sutaon nila kun natuman ba ang health protocols, tan-awon sab nila kun unsa ka daghan ang nahimong violations sa mga jeepney drivers aron ilang makorihian.
“I think two weeks would be sufficient time to evaluate and make adjustment so that when those units from the other cities coming sa Cebu we are more prepared to handle them,” si Cuenco pa.
Kun pananglitan tugotan na ang mga TPUJ gikan sa ubang lugar nga makasulod sa Cebu City kinahanglang mosunod sila sa mga rekisitos sama sa gihimo sa mga TPUJ drivers sa dakbayan.
Nakasabot sab si Cuenco nganong wa makaabot sa target nilang gidaghanon nga 1,3500 ka TPUJs ang tugotan nilang makabiyahe sud sa siyudad tungod kay dunay mga operators nagduha-duha aning pagsaka sa kaso sa Covid- 19 unya mausik ilang gasto sa pagproseso sa ilang subling pagbiyahe.
Apan ang tigpamaba sa Department of Health-7 Dr. Mary Jean Loreche miingon dako kaayo ang tsansang nga makatakod ang virus sa ubang mga lugar kung mobalik na ang operasyon sa mga jeepneys.
Kini tungod kay mas sayon lang ang lihok sa katawhan ug modaghan usab ang ilang mga pangbuhaton sa gawas sa ilang panimalay.
Matud ni Loreche, kun mahinayon gyud kini mas maayong himuong regular ang pag-test sa mga drayber ug seryusohon dili lang sa mga nagbantay ang pagpatuman sa minimum health protocols kondili hasta ang publiko mismo. —Rowena Capistrano/IBM (BANATNEWS)
- Latest