150 ka Mandauehanon nakapahimulos na sa Teleconsult

CEBU, Philippines — Nikabat ngadto sa 150 ka molupyo sa Dakbayan sa Mandaue ang nakapahimulos na sa gibuksan nga Teleconsult alang sa ilang medical ug psychological intervention.                      

Si Dr. Ligaya  Lakambini Dargantes, pangulo sa COVID-19 Patient Management and Patient Care Team sa siyudad nagkanayon nga ang kadaghanan sa mga nanawag ug nangunsulta kanila kadtong mga pasyente  nga gibati og kabalaka nga gitakboyan kini sa COVID-19.

Adunay mga pasyente usab kinsa nag-antos sa depression nga giingong dili na mahimutang sa ilang kaaugalingon tungod sa kabalaka sa gihambin niining sakit. 

Dugang ni Dargantes nga ubang mga pasyente nga nangunsulta nabalaka nga sila natakboyan sa COVID-19.

Ug nawagtang ang ilang mga kabalaka dihang nadawat na ang resulta sa ilang test  nga negatibo sila sa COVID-19. –BDB (BANATNEWS)