“Bodegera” sa shabu nadakpan

CEBU, Philippines — Arestado ang usa ka 34-anyos nga babaye nga gipasanginlang bodegera sa ginadili nga drugas sa gihimong operasyon sa mga sakop sa Sawang Calero Police Station sa Dakbayan sa Sugbo.

Ang buy bust operation gipangulohan ni Police Major Eduard Sanchez diha sa Belgium Street, Barangay Suba Huwebes sa gabii nga miresulta sa pagkasikop kang Mary Joy Maranga. Nasakmit gikan sa dinakpan ang mga pinutos sa ginadili nga drugas nga motimbang og 150 gramos nga mobalor og usa ka milyon ka pesos ug buy bust money.

Ang dinakpan sumala pa ni Sanchez bodegera sa illegal nga drugas tungod kay mao kini ang tigtip-ig sa mga supply maong giisip kini nga usa ka high value individual. Ang dinakpan nagtingkagol na karon ug gipaabot ang pagpasang-at niini ug tukma nga kaso nga paghupot ug ginadili nga drugas.

Sa pikas bahin, duha ka barangay sa Dakbayan sa Talisay gipaabot nga madeklarar nga drug cleared sumala pang Police Major Gerard Ace Pelare, pangu sa kapulisan sa maong dakbayan.

Matud pa ni Pelare nakasumiter na sa mga gikinahanglan nga dokumento ngadto sa Philippine Drug Enforcement Agency (PDEA) Tapul pinangulohan ni kapitan Mary Ann Nolasco ug sa Manipis nga pinangulohan ni kapitan Joselito Laurente. Ang duha ka barangay pipila lang sa mga bukirang barangay sa Syudad.  Hinuon si Pelare nipasabot nga samtang nagung-ong pa ang deklarasyon padayon sila nga nagmonitor kung wala bay mga ilegalista nga nisulod sa maong lugar. —Gabriel Bonjoc/IBM (BANATNEWS)