Cash subsidy gihatag sa LTFRB sa mga jeepney operators

CEBU, Philippines — Mokabat sa 1,992 ka jeepney operators ang nahatagan sa Land Transportation Franchising and Regulatory Board (LTRFB) sa Direct Cash Subsidy isip tabang sa mga operators nga apektado sa COVID-19 pandemic.

Matud ni LTFRB-7 Director Eduardo Montealto Jr. ang maong subsidy ihulog sa Pantawid Pasada Cards ug gisugdan ang paghatag niini niadtong Martes ug gi-formalize lang kini kagahapon aron mahibaw-an sa tanan nga dunay ingon ani nga programa nga Direct Cash Subsidy.

Nasayran ang mga operators makadawat og P6, 500 nga subsidy sa kada unit sa jeep de pasaheroan nga ilang gipanag-iya.

“Moadto na siya sa mga operators, we have 1,922 units maoy mahatagan anang P6,500 per unit...Sa operator lang na siya kay among kuan operator raman gyud naa sa franchise, ang operator ra puy bahala sa iyang mga drivers”, suma pa ni Director Montealto .

Ang nahisgutang ahensiya sa gobyerno nanghinaot nga ang maong financial aid makatabang sa mga operators nga makabalik ilabi na karon nga gitugutan na ang mga Traditional Public Utility Jeepneys nga makabiyahe ilabi na sa Cebu City.

Samtang sa laing bahin mokabat sa kapin sa 12.5 milyones pesos ang gipagawas sa Department of Labor and Employment DOLE isip cash assistance sa mga kawani ubos sa Covid-19 Adjustment Program (CAMP)-Bayanihan 2.

Matud pa ni DOLE-7 Regional Director Salome Siaton, nakabenipisyo niini ang  2,500 ka mga trabahante gikan sa 231 ka mga establisamento nga nakadawat ug P5mil nga financial assistance.

Dugang pa ni Siaton, adunay tipik sa disbursed funds ang napadulong sa money remittance isip service charge amount nga moabot sa 50mil ka pesos.

Posible nga mausab pa ang datos sa ilang gipagawas tungod kay padayon pa man ang ilang pag evaluate sa CAMP Applications sa ilang mga field offices.

Lakip sa mga nakadawat sa assistance naggikan sa siyudad sa Sugbo, Mandaue ug Lapu-lapu nga gilangkuban sa dili mominos sa 713 ka mga trabahante gikan sa 41 ka establisamento.

Sa Cebu Province 23 ka mga patigayon ug 189 ka mga workers, samtang sa Bohol 326 ka mga trabahante nakadawat sa 5 mil pesos ug sa Negros 1,119 ka mga empleyado gikan sa 153 ka mga buhatan ang nakadawat usab sa maong ayuda. —Rowena D. Capistrano MEL (BANATNEWS)