Babaye nakuhaa’g kapin usa ka kilong shabu
CEBU, Philippines — Kapin usa ka kilong gidudahang shabu ang nasakmit atol sa gipahigayon nga buybust operation sa City Intelligence Unit ( CIU) sa CCPO pinangulohan ni Police Major Randy Caballes kagahapon sayo sa buntag diha Barangay Tisa, siyudad sa Sugbo.
Ang dinakpan giila sa kapolisan nga si Jeanneth “Jean” Gadiane Abayan,33, kasamtangan nanimuyo sa maong dapit.
Matud pa ni Caballes nga napriso na si Abayan niadtong bulan sa Mayo tuig 2015 tungod gihapon sa pagpamaligya og illegal nga drugas apan gipabuhian sa korte niadtong Oktubre 2019. Dugang pa ni Caballes nga kapin sa usa ka semanang gibantayan ang kalihokan ni Abayan hangtud nakompirmar nga nibalik kini sa maong illegal nga negosyo.
Nasuta sa ilang pagpaniid nga makabaligya kini og usa hangtud duha ka kilong shabu kada semana.
Dugang pa ni Caballes nga gikan sa Cebu City Jail ang kontak ni Abayan usa ka Allain Ramas Badajos alyas " Balo" nga taga Barangay Ermita.
Matud pa nga mitug-an si Abayan nga adunay motawag kaniya og mohatud sa mga drugas nga maoy iyang ibaligya. Kapin sa usa ka kilong gidudahang shabu nga mobalor kapin sa P6.9 milyones ang nasakmit gikan kaniya.
Pasakaan kii og kasong kalapasan sa Sec.5 Sec.11 Art 2 RA 9165 o pagpamaligya og ginadiling drugas. —IBM (BANATNEWS)
- Latest