PUJ drivers nag-rally aron makabalik na pagbyahe

CEBU, Philippines — Nagpasiugda og rally sayo sa buntag niadtong Martes Nobiyembre 17, 2020 ang pipila ka mga driver sa traditional public utility jeepney (TPUJ) aron ipadangat ang ilang mga yangongo ngadto sa kagamhanan.

Gihimo nila ang maong rally atubangan sa Department of Agriculture Central Visayas 7 nga nahimutang sa Ibabao Estancia sa Dakbayan sa Mandaue.

Naglakip  sa ilang hangyo mao ang pagpabalik na kanila sa ilang rota base sa nahimutang sa ilang prangkesa ug ingon man ang paghatag ug libreng swab test sa gobyerno alang sa mga drivers.

Gipadangat usab nila ang ilang hangyo nga dili una mobayad sa ilang napundo nga traffic violation sa ilang pagbalik og biyahe sa ilang rota.

Lakip sa misalmot sa rally mao ang mga sakop sa Pinagkaisang Tsuper at Operator Nationwide (PISTON).

Kadaghanan kanila miingon nga dugay sila nga na-estambay ug maglisod sila kon maoy mosugat sa ilang pagbalik og biyahe ang mga napundo nilang balayranan sa traffic violation nga ilang nahimo sa miaging mga bulan niining tuig 2020. /MEL (BANATNEWS)