Mga birthing center sa Cebu City gipatawag

CEBU, Philippines — Si Konsehal Joel Garganera, deputy chief implementer sa Inter-Agency Task Force Emergency Operations Center Cebu City nibutyag nga alas 10:00 kagahapon sa buntag gi-meeting nila ang mga representante sa mga birthing center sa siyudad.

Ang maong pagpatawag kalabotan kini sa siyam ka mabdos kinsa nagpositibo sa COVID-19 sulod niining buwana. Nasuta sa Emergency Operation Center nga ang maong siyam nga nagpositibo sa COVID-19 gikan sa mga birthing center ug posibleng didto kini nanganak tungod kay sa tambalan required kini nga kuhaan og swab test ang ang mga mabdos sa dili pa manganak.

“Gipatawag nato ang tanang birthing centers aron matan-aw nato labi na katong mga birthing centers nga gikan ang positive ug unsay ilahang intervention, gi-decontaminate ba, na-contact trace didto ang katong mga uban sab nga mga pregnant women who been visiting them as well as ang ilaha pod nga mga staff”, ni Garganera pa.

Samtang sa sunod semana gikatakdang adunay half day nga seminar ang ipahigayon sa mga shipping lines diin tumong niini nga mapahibawo sila nga magbutang  og Health Infectious Protection Control Office(HIPCO).

“Tanan nilang barko adunay HIPCO, just in case naay mahitabo kahibawo nata unsay tawagan just like what happened last week nga atong na-lockdown mismo ang maong barko...These are the things to be discussed by the EOC and Bryan Lim sa maong meeting”, dugang ni Garganera.–BDB (BANATNEWS)