Simbahan, Kapitolyo mopadala og hinabang sa Luzon

CEBU, Philippines — Ang Cebu Caritas Incorporated sa Archdiocese of Cebu mopadala og hinabang ngadto sa mga apektado sa bagyong Rolly ug Ulysses sa Luzon.

Kini ang gibutyag ni Padre Alex Cola, pangulo sa Cebu Caritas Inc. nga nahinabi sa Banat News.

Matud ni Cola nga si Archbishop Jose Palma nipagawas og circular letter ngadto tanang parokya alang sa pagkolekto og second collection sa nilabay nga Domingo isip hinabang ngadto sa mga apektado sa bagyo.Ang hinabang nga ipadala ipaagi kini ngadto sa Caritas Manila ug mao na kini ang mopaabot sa nahisgutang tabang ngadto sa mga naapektohan sa bagyo.

Ang Caritas padayon kining niawhag sa katawhan nga mopaambit gihapon sila sa ilang grasya ilabi na ngadto sa mas labing nanginahanglan.

Subay niini, gikonsiderar karon sa Probinsiya sa Sugbo ang paghatag og ayuda ngadto sa mga apektado sa bagyo sa Luzon. “We are trying to assess katong badly hit and we will consider sending some” matud ni Gobernador Gwendolyn Garcia.

Si Garcia wala mobutyag sa kantidad sa hinabang nga ihatag ug matud niya nga dili kini susama kadako kaniadto nga donasyon sa Kapitolyo sa mga lugar nga naapektohan sa katalagman.

Kini gumikan kay ang Sugbo bisan og wala maigo sa bagyo apan daghan usab ang naglisod tungod sa pandemiya sa COVID-19

Gipa-asses karon sa Provincial Social Welfare and Development Office aron masuta ang labing apektado aron mahibaw-an ang mapadala nga hinabang. – Le Phyllis F. Antojado/BDB (BANATNEWS)