Garcia uyon sa face to face nga klase
CEBU, Philippines — Nipadayag sa iyang pag-uyon si Governor Gwendolyn Garcia sa Probinsiya sa Sugbo sa pagpahigayon og face to face classes sa probinsiya.
Kini human nga ang Department of Education (DepEd)-7 nisugyot og limitado nga face to face learning sa mga pampublikong tunghaan diin kaduha sa usa ka semana kini ipahigayon ug limitahan lang sa 50 porsyento ang capacity.
Unahon una ang mga lagyo nga public school sa mga isla o bukirang barangay.
Nakita ni Garcia nga dili kaayo epektibo ang modules ug online classes tungod kay ang probinsiya dili pa kini internet ready.
“We conducted a survey sa tibuok province town by town the best nga figure was only 20 percent nga internet ready. So of course nag-modules ta, mahal kaayo sa ngatanan”, ni Garcia pa.
Gibutyag ni Garcia nga matag module nagkantidad kini og P280 unya upat ka modules sulod sa usa ka bulan ang ipang-apod-apod ngadto sa kapin 600 mil ka tinun-an sa Probinsiya sa Sugbo.
Gani anaa sa P1.2 bilyon ang proposed budget niini sa DepEd alang sa 10 ka bulan.
Si Garcia nagkanayon nga wala mogahin ang probinsiya niini.
Si Dr. Salustiano Jimenez, direktor sa DepEd-7 ug miyembro sa Regional Inter-Agency Task Force (RIATF) nagkanayon nga nisumiter sila og proposal alang sa limitado nga face to face classes ug giendorso kini ngadto sa National Inter-Agency Task Force (NIATF).
Kini human nga ang DepEd-7 nakadawat og 160 ka resolusyon gikan sa nagkadaiyang parent-teacher associations (PTAs) local government units (LGUs) sa Central Visayas nga naghangyo sa pagbalik sa physical classes.
Ang Leaugue of Municipalities in the Philippines (LMP)-Cebu chapter nipasar usab og resolusyon pagsuporta sa pagbalik sa face to face classes. – BDB (BANATNEWS)
- Latest
