Namatay sa kahinam?
CEBU, Philippines — Wala makaabot nga buhi sa tambalanan ang usa ka 64 -anyos nga retiradong kawani sa usa ka ahensiya sa gobiyerno nga gituohang giatake sa iyang sakit sa kasingkasing tungod sa naghinubra nga kahinam pagsud-ong sa hubo nga lawas sa 28- anyos niyang hinigugmang babaye sa sulod sa usa ka pribadong lawak sa gisudlan nilang beach resort sa Barangay Estaca sa Lungsod sa Compostela. Si Police Captain Vincent Zozobrado nga maoy hepe sa Compostela Police Station miingon nga ang 28 anyos nga babaye miasoy nga nagkarelasyon silang duha sa namatay pinaagi sa Facebook.
Nagkasabot silang duha nga magkita sa usa ka resort sa maong barangay niadtong Lunes sa hapon Nobiyembre 16, 2020.
Ang babaye miangkon nga samtang diha na sila sa lawak, gihubo niya ang iyang mga sapot aron maligo sa banyo.
Apan pwerte niyang kurata nga ang 64-anyos nga nagsige og tutok sa iyang hubo nga lawas wala na mamilok ug naglisod sa pagginhawa. Daling midagan sa gawas ang babaye aron pagpangayo og tabang sa mga resort personnel. Gidala kini sa labing duol nga tambalanan apan gideklarar sa mga doktor nga dead on arrival.
Nunot niini mohimo pa og dugang imbesitigasyon ug ilang gisugyot sa mga kabanay sa namatay sa pagpaubos autopsy sa patay’ng lawas alang sa pagsuta sa hinungdan sa kamatayon niini.— IBM (BANATNEWS)
- Latest