Gidudahang “mamarokay” gipatay

CEBU, Philippines — Patay ang usa ka giingong mamarokay human kini gipusil sa wa ilhing mamumuno diha sa Sitio Kilawan, Barangay Tanke, Dakbayan sa Talisay kagahapon sa kaadlawon.

Ang biktima mao si Bladie Mherl Cabalda Badayos, 22, nagpuyo sa maong lugar. Si Patrolman Eleazar Belcin~a sa Talisay City Police Station nagkanayon nga nag estambay ang biktima dili layo sa ilang panimay.

Kalit miabot ang wa mailhing tyawo ug miduol sa luyong bahin sa biktima ug gipusil kini sa ulo. Pagkahagba sa biktima yanong milakaw palayo ang lalaki.

Ang igsuon sa namatay nitug-an sa otoridad nga mogamit og ilegal nga drugas ang igsuon apan ang mga silingan nagtuo nga mamarokay kini og ginadiling drugas.

Sa laing bahin, walo ka gidudahang durugista ang nasikop sa sunod-sunod nga operasyon sa kapulisan sa maong dakbayan sa nakalabay nga duha ka adlaw.

Si Police Major Gerard Ace Pelare, pangu sa Talisay City Police Station  miila sa mga nasikop sa Barangay Tabunok mao silang Lirven Bacus Amodia, 25,  Alan Jay Cabingatan, 26 , ug Reymark Lapinig Nacario, 28. Nadakpan sab sa Bulacao silang Maria Caselle Cabañero, 35, ug si Lorenzo Diaz, 25.

Sa Dakbayan sa Sugbu, nadakpan ang 37-anyos nga ginang nga manindahay og tsitsaron human ni-sideline pagpamaligya og illegal nga drugas diha sa Sitio Riverside, Barangay Lorega San Miguel.

Ang nasikop mao si Haydee Binghay, residente sa maong lugar. Nangulo sa maong operation mao si Police Major Armando Labora, hepe sa Parian Police Station.

Nasakmit kang Binghay ang mga pinutos sa ginadili nga drugas nga mobalor P50 mil ug buy bust money.

Ang dinakpan nitug-an nga ang kapuyo niya nga nakaikasy mao gyuy tigbaligya og drugas samtang siya tigtunol lang niini kung wala ang iyang partner.— Rowena D. Capistrano/IBM (BANATNEWS)