Grupo sa motorista sa Lapu-Lapu nihatag og hinabang

CEBU, Philippines — Nagkahiusa ang grupo sa mga motorista  sa Dakbayan  sa Lapu-Lapu sa pagtunol og hinabang alang sa mga biktima sa bagyong Ulysses ngadto sa Luzon.

Nunot niini, sa post ni Mayor Junard Ahong Chan sa  iyang facebook page iyang gipadangat ang mga pagpasalamat ngadto sa maong grupo sa ilang paghatag og tabang   sa mga biktima sa katalagman.

Gikataho nga ang maong motorcycle group nagpasiugda og donation drive aron makatigom og mga hinabang nga ipadala ngadto sa mga biktima bagyo.   “Dili masukod ang akong kalipay nga ang mga Opongan nagkahiusa ug nibati og kaluoy sa atong isig ka Pilipino bisan pa man nga anaa kita sa laing lugar”, tipik sa pamahayag ni Chan. –Rowena D. Capistrano/BDB (BANATNEWS)