Cimatu mimando paghawan sa mga kasapaan sa Cebu City

CEBU, Philippines — Gihangop ni Department of Environment and Natural Resources Secretary Roy Cimato ang kagamhanan sa Siyudad sa Sugbo gumikan sa nagpadayon nga kampanya niini sa paguba sa mga estrakturang nakabalda agianan sa tubig sa kasapaan.

Sumala pa ni Cimato dili angay pasagdan ang maong problema. Iyang gimandoan ang DENR-7 nga makigalayon sa city government aron pagsulbad niini.

Pinaagi sa mapa nakita ni Cimatu nga duna gyuy nga  establisamentong nakababag sa kasapaan sa siyudad ug buot niya kining matangtang.

Sa miaging buwan gilunopan sa baha ang kadalanan sa siyudad ug nakitya nga kaning mga babag nga estraktura sa mga establisamento nakatampo sa pagbara sa mga basura maong mitipas na ang tubig padung sa kadalanan.

Gitigom na usab sa kagamhanan ang mga building administrators ug gipahibalo sa ilang mga obligasyon.

Apan gipaabot pa kun duna ba kanilay mosanong sanglit adunay uban kanila nga dekada 70 pa og hinangyoay ang dakbayan kanila apan wala mokihol.

Si Mayor Edgardo Labella mihatag og kahigayonan kanila nga gub-on ang ilang estraktura.

Sa pikas bahin, ang Office of the Building Official mipahinumdom sa mga kapitan sa barangay pag-monitor ug paggamit sa ilang supervisory authority may kalabutan sa mga magtukod og ilegal nga estraktura sa ilang hurisdiksyon pinaagi sa pag isyu ug cease and desist orders batok sa mga tag-iya.

Ang pangulo sa OBO Florante Catalan, mibutyag nga 206 ka estrakturang babag sa agianan sa tubig sa 17 ka mga dapit sa siyudad ang ilaha nakita ug ilaha kining ipa-validate sa task force.

Duha ka establisamento na ang ilang gihatagan og notisya bahin sa ilang kalapasan sa three-meter easement zones gikan sa tampi sa sapa nga gimando sa balaod. –Rowena D. Capistrano/IBM (BANATNEWS)