Nabara sa traffic diha sa mga utlanan

CEBU, Philippines — Nasinati kagahapong adlawa, unang adlaw sa subling paghigpit sa border control sa Cebu City  ang grabeng paghuot sa trapiko sa mga utlanan niini sa mga silingang mga lugar. od sa higpit nga pagsusi sa tanang mga mosulod sa siyudad gikan sa laing lugar kun unsa ka importante ang ilang tuyo sa pagsulod sama sa trabaho ug kadtong balido gyud ang rason sa ilang pag-anhi sa dakbayan.

Kahinumduman nga nagpagawas og kamanduan si Mayor Edgardo Labella nga ang makasulod lang sa siyudad kadtong mga trabahante, Authorized Person Outside Residence (APOR) ug mgal tawong adunay official business sa siyudad.

Apan tungod sa paghigpit, mitaas ang kutay sa mga sakyanan nga natanggong sa trapiko ini’g abot diha sa quarantine control checkpoints.

 “First time man ta nag-reinstate karon so mao to adjustment have to be made and Col. Ligan has assured us that adjustment will have to be made,” ni Labella pa human nasayod sa problema sa traffic nga namugna didto sa mga silingang lugar.

Sa pagsubay sa Banat News, sa pipila ka mga borders control points, duna gyuy mga motoristang wala pasudla human tungod ang uban kanila walay mga dokumento, duna say mga nagmotor nga nag-angkas og bata.

Wala hinuoy problema kadtong mogawas sa dakbayan sanglit wala may gipatumang higpit nga border control ang mga silingang lugar.

Kadtong mga gikan sa probinsya nga adunay dokumento sama sa quarantine pass, COE, Driver’s License ug Certificate of Registration lahos ra nga makasulod sa siyudad. Gawas sa traffic, bagang duot usab sa mga pasahero ang nakita nga nag linya sa may Bulacao ug Pardo nga nagpaabot makasakay padulong sa ilang tagsa-tagsa ka mga destinasyon.

Tungod niini, gihangyo ni Labella ang MyBus ug Ceres buses nga padugangan pa ang ilang mga units nunot sa kakuwangon sa transportasyon sa mga pasahero samtang wala pa kabalik ang mga TPUJs.

Mograbe pa

Si Alma Fe Casimero, hepe sa Cebu City Transportation Office miingon nga dili gyud kalikayan nga maghuot ang trapiko sa mga utlanan sa siyudad tungod sa paghigpit balik sa border control.

Mas gipaabot nga mograbe pa gyud ang traffic kun mobalik na og biyahe ang mga jeepneys sa kadalanan sa siyudad.

“Dili pa gyud na mao. Naa pa gyu’y mas traffic nga atong ma-experience. Ngano man? Padaganon naman sad nato ang jeepneys, so possibly, dili lang gyud siya kana lang, huot pa gyud ana,” si Casimero miingon.

Panawagan ni Casimero sa mga sumasakay nga dili kalimtan nga Covid-19 naa pa gihapon. “Sa atong mga commuters, di nato kalimtan nga naa pa ta sa hugot nga pagpatuman sa atong health protocols. Magbantay lang gyud ta ug mag-amping lang gyud ta nga dili ta makakuha og sakit. Mag social distancing ta, wear ta og face mask, of course, hygiene, manghugas ta sa atong mga kamot,” matud niya.

Dugang pa niya, kadtong dili importante ang tuyo dinhi sa siyudad mas maayong dili nalang moari aron malikay sa paspas ang pagkatap sa virus.—Rowena Capistrano, Gabriel Bonjoc, The Freeman/IBM