Bag-ong mga kaso, nakuha gikan sa trabaho ug tapoktapok

CEBU, Philippines — Nisaka pagbalik ngadto kapin usa ka libo ang aktibong kaso sa coronavirus disease sa Central Visayas human nga adunay 160 nga nadugang sa mga bag-ong kaso base sa Nobiyembre 14, 2020 nga datus sa Department of Health-7.

Sa mga bag-ong kaso, 59 niini ang Cebu City, 30 sa Lapu-Lapu, 18 sa Mandaue, duha sa Bohol ug 51 sa Probinsya sa Sugbo hinungdan nga ang active cases anaa sa 1, 057.

Samtang unom ra ang natala nga recoveries niadtong adlawa nga naapil sa 20, 812 nga total recoveries sa Central Visayas.

Matud pa nga kining mga bag-ong kaso nakakuha sa maong sakit gikan sa ilang mga trabahoan, ug mga tapok-tapok ug sa mga okasyon (sama sa birthday parties, pagduaw sa mga paryente, bakasyon sa laing lugar, namista); sunod mao ang  sa transportasyon, merkado publiko ug mga pasilidad nga giadtoan sa natakboyan.

Ang bag-ong 59 ka mga kaso nagagikan sa 22 ka barangay: Unom sa Guadalupe; lima sa Calamba; upat sa Kalunasan; tagtulo sa Apas, Kasambagan, Labangon, Lahug, Mabolo, Pulangbato, ug Tisa; samtang tagduha sab sa Luz, Lahug, ug  Punta Princesa; tagsa sa Bacayan, Banilad, Bulacao, Capitol, Inayawan, Quiot, Sambag 1, Sambag 2, Talamban, ug Tejero.

Sumala pang Guadalupe Barangay Kapitan Michael Gacasan, karon duna na silay 22 ka aktibong kaso ug naguol siya niining bag-ong nadugang kay sa miaging semana palang sila na Covid-free.

Bisan wa pay pormal nga kamandoan ang siyudad, subling pahigpitan ni Gacasan ang ilang pagbantay.

Ang total Covid-19 cases lukop rehiyon 7 anaa sa 23, 239 ug 1, 370 niini ang namatay. —The Freeman/IBM (BANATNEWS)