Simbahan dunay kalihukan pagtabang sa mga biktima sa bagyo

CEBU, Philippines — Auxiliary Bishop sa Archdiocese of Cebu Bishop Midyphil Billones, Team Moderator sa National Shrine of St. Joseph Mandaue City niawhag sa katawhan nga mopaambit sa ilang grasya ngadto sa mas labing nanginahanglan.

Dihang nahinabi sa Banat News human sa misa sa kapistahan sa Boljoon kagahapon, gipadayag ni Billones, nga importante kaayo ang pagtinabangay sa matag usa. Gumikan sa nasinati nga sunod sunod nga bagyo nga grabeng naka-apekto sa luzon, giawhag niya ang mga magtutuo nga makighiusa sa Arcdiocese of Cebu nga nagpahigayon ug kalihukan pagtabang sa mga biktima sa katalagman.

Dugang pa ni Billones, ang mga sugbuanon naila nga matinabangon, hinungdan bisan unsa nga bagyo nga moabot makapalig-on kini kung maghuptanay ang usag-usa.

Gitug-an ni Billones nga iyang gipadangat ang iyang mga pag-ampo ngadto sa tanang mga tawo nga naapektuhan sa sunod sunod nga bagyo ilabi na didto sa Luzon.

Samtang gihangyo usab ni mayor Gerald Anthony “Samsam” Gullas Jr. sa Syudad sa Talisay ang nagkalain-laing buhatan nga ipadayon ang pagpanghatag og hinabang alang sa mga nabiktima sa bagyo.

Una niini, si Gullas nagpahigayon og piso-piso nga tabang sa ilang buhatan alang sa mga naapektahan sa bagyong Rolly.

Apan ning bag-o lain nasab nga lugar ang naapektahan sa bagyo nga ginganlan og Ulysses.

Matud pa ni Gullas nga dili lang piso-piso nga tabang ang ilang gidawat kundi lakip na ang mga sapot o bisan unsa nga butang nga mahimong ihatag sa mga nabiktima sa bagyo.

Iyang gidasig ang mga kapitan ug uban nga opisina sa paghimo sab sa ingon aron mas daghan nga hinabang ang ilang mahatag.

Gidugang ni Gullas nga mas maayo nalang nga kita ang manghatag kaysa kita ang hatagan tungod kay dili lalim nga mabiktima o maigo sa katalagman. Gabriel C. Bonjoc/MEL (BANATNEWS)