Ex-kagawad gipusil patay

CEBU, Philippines — Kanhi barangay kagawad sa Balao, Lungsod sa Barili ang gipusil sa makadaghan nga higayon sa bana sa iyang kanhi tindera samtang nagpreparar unta kini sa iyang baligyang pagkaon sa may merkado sa Barangay Mantalongon sa maong Lungsod, Miyerkules sa gabii.

Ang nakalas naila nga si Porferio Reyes Jr., 52, residente sa maong lugar. Samtang ang suspetsado mao si Jay-Lito Bendanillo, 40, taga Sitio Ungga, Barangay Boloc-Boloc apan lumad nga taga Candabong Lungsod sa Dumanjug ug usa ka fish vendor.

Matud pa ni Police Staff Sergeant Pablito Caadlawon, nag-andam sa iyang lutuong larang ang biktima  sa dihang kalit niabot ang suspek ug gipusil kini makadaghang higayon. Nakaangkon og daghang samad pinusilan ang biktima gikan sa kalibre 45 pistola nga gigamit sa suspek. Nadakpan ang suspek sa hot pursuit operation sa lungsod sa Dumanjug. Ang suspek mihimakak sa pasangil.

Gisusi sa kapolisan ang anggulong love triangle apan wala na mohatag pa og dugang impormasyon ang kapolisan mahitungod niini.  —IBM (BANATNEWS)