Opisina sa ABC sa Lapu-Lapu City gi-padlock

CEBU, Philippines — Gipadlock ang opisina sa Association of Barangay Councils sa siyudad sa Lapu-Lapu City sa wala pa mailhing tawo o mga tawo.

Matud pa ni ABC president Eduardo Cuizon nga nakugang na lang siya nga sa pag abot niya sa iyang opisina Miyerkules, Nobyembre 11, 2020 sa buntag nga dili na siya makasulod kay gi-padlock kini sa usa ka cable lock.

Gawas sa iyang opisina, gi-padlock usab ang opisina sa iyang mga staff ug gibungkag sab ang lock sa pultahan sa kusina.

“Wala gyud mi suspect kung si kinsa ang naghimo ani. Mao na akong awhag sa police sa Lapu-Lapu City ug ni Mayor Ahong Chan nga unta ipaimbestigar gyud ni ug tinud-anay aron mahibaw-an gyud kinsa ang naghimo ani,” matud pa ni Cuizon, usa sa mga political allies ni Lapu-Lapu City Lone District Representative Paz Radaza.

Dugang pa ni Cuizon nga wala siyay gidudahan kinsa ang naghimo o nagsugo ba kaha sa pagpadlock sa maong opisina.

Matud pa ni Cuizon nga sukwahi kini niadtong gipapahawa ang opisina ni Congresswoman Radaza sulod sa City Hall kay giisyuham gyud og notice to vacate ni Chan.

Sa nahinumduman gipadlock ang opisina ni Radaza sa dihang nagdumili kini nga mohawa.

Sa iyang bahin, si Chan miingon nga  wala siyay kalibutan sa pag-padlock sa opisina sa ABC.

Si Cuizon  mitawag sa mayor ug nananghid nga iyang gub-on ang maong mga padlock. “Nisugot ra man pud ang mayor nga akong gub-on ang padlock,” matud pa ni Cuizon.

Nagkanayon si Cuizon ang ABC building diin natukod panahon ni Radaza isip mayor sa siyudad, gawas sa ABC office naa pay laing tulo ka oplsina ‘nga nagkupot pud sa yawe.

Nangayo usab og police assistance si Cuizon nga mahimong witness unta inig sulod niya sa iyang opisina ug sa secretariat human sa pagguba, apan walay pulis nga niabot kay matud pa busy sa pagbantay sa motorkada sa Birhen sa Regla alang  sa kalihukan sa pagsaulog sa fiesta sa maong siyudad.

Ang Lapu-Lapu City Police Station naa lang kilid sa ABC Building. Nasagmuyo ang kapitan kay matud pa niya pwerteng duola ra man unta ang ABC Building sa police station. —IBM (BANATNEWS)