Mahimong maghikay apan gidili ang bisita
CEBU, Philippines — Gisugdan na ang nobinaryo sa piyesta sa Birhen sa Regla, ang patron sa Dakbayan sa Lapu-Lapu kagahapon pinaagi sa pagpahigayon og motorkada sa imahen sa Birhen.
Ang tinuig nga pangilin sagad nga pagahimoon sa Nobyimbre 20 ug 21 nga maoy naandan sa pagsaulog sa iyang kapistahan.
Subay niini hugot nga gipahimangno ni Mayor Junard Ahong Chan sa katawhan nga motuman gihapon sa mga lagda tungod kay ubos gihapon sa modified general community quarantine ang siyudad.
Lakip sa hugot nga gipatuman mao ang curfew, pagsul-ob og face mask, face shield, kanunay nga paghugas sa kamot ug pagtuman sa physical distancing.
Gidugang ni Mayor Chan nga mahimo nga maghikay o mag-andam og pagkaon ang mga Oponganon apan alang lamang kini sa mga sakop sa pamilya ug gidli ang pagdawat og bisita.
Si Nagiel Bañacia ang pangulo sa City Disaster Risk Reduction and Management Office (CDRRMO) miingon nga bisan sa namatikdan na nga pagkunhod sa gidaghanon sa COVID infection sa dakbayan apan dili gihapon angay nga mokumpiyansa niini ang mga Oponganon.
Gipahinumdum usab ni Mayor Chan nga padayong gipatuman ang liquor ban ug ang siyudad wala pa gihapon nitugot sa mga bar ug mga establishment nga nagtanyag ug alcoholic beverages nga mo operate.
Samtang nihalad og pag-ampo si Mayor Chan ngadto sa Mahal nga Birhen sa Regla alang sa mga nabiktima sa bagyo ilabi na didto sa Bicol Region. Sa Social Media Page sa mayor, gibutyag niini ang iyang mga kabalaka sa Bicol kini human dili pa sila dugay giigo sa bagyong rolly misunod usab dayon ang bagyong Ulysses.
Sumala pa ni Chan, subo kaayo pamalandongon nga adunay kinabuhi nga nakalas tungod sa maong bagyo ug dunay mga pamilya nga nawad-an og pinuy-anan. —Rowena D. Capistrano/MEL (BANATNEWS)
- Latest