CCTO magpadayon sa operasyon batok illegal parking

CEBU, Philippines — Way hunong ang mga sakop sa Cebu City Transportation Office CCTO sa ilang operasyon batok sa magpataka og parking sa ilang mga sakyanan.

Kagahapon sa kadlawon niabot og 105 ka mga sakyanan ang gi-clamp sa CCTO atol sa ilang operasyon.

Ang CCTO nihimo og operasyon dili pa lang dugay sa pipila ka kadalanan sa Mabolo, Kasambagan ug sa area        sa J. Avila ug Juana Osmeña.

Suma pa sa tigpamaba sa CCTO nga si John Paul Amores nga dunay uban nga nagbutang gyud og tabon sa ilang mga sakyanan nga daw nanag-iya na sa kadalanan.

“Kun naa sila’y mga sakyanan, dapat pud duna silay saktong parkinganan.Dili sila magpataka og plastada. Nakabalda man gud na sila ilabi na kun dunay moagi nga emergency vehicles,” suma pa ni Amores.

Gidugang niya nga nakahatag og kontribusyon sa lapad nila nga operasyon mao ang mga nadawat nila nga complaints gikan sa mga concerned citizens.

Ang CCTO mipahimangno sa katawhan nga magpadayon gihapon ang ilang surpresa nga mga operasyon. —MEL (BANATNEWS)