Nagbisekleta naigo sa kilat

Cebu, Philippines — Namatay ang usa ka 38- anyos nga lalaking gituohang naigo og kilat samtang kini nagbiseklita sa hawan nga lugar sa Barangay Ibabao sa Lungsod sa Cordova alas 5 pasado ang takna sa hapon  miaging Lunes, Nobyimbre  9, 2020.

Si Jenvi Requina nga sakop sa Cordova Disaster Risk Reduction and Management Office (CDRRMO) miila sa namatay nga mao si Michael Hernaez, nagpuyo sa Barangay  Babag II sa Dakbayan sa Lapu-Lapu.

Sa pakisusi nga gihimo sa  kapolisan sa Cordova Police Station gikan pa sa trabaho si Henaez ug padulong na kini pauli sa ilang panimalay sakay sa iyang biseklita.

Matud pa nga nagtutaligsik niadtong higayona apan wala kini mopasilong ug mipadayon sa pagtindak hangtud nga naabot kini sa usa ka hawan.

Sunod nalang nga nadungog ang kusog kaayong lipak sa kilat ug nakita si Henaez nga nahagba sa ubos. Nakita nga naigo sa kilat ang iyang bisekleta nga ginama sa metal. Ang mga tawo daling miduol ug mitabang kang Henaez nga gihulagway nilang nasunog ang lawas.

Daling gidala sa mga sakop sa CCDRMO si Henaez ngadto sa Lapu-Lapu City Hospital sa Sitio Carajay sa Barangay Gun-ob apan ang mga doktor nga nag-atiman mideklarar niini nga dead on arrival. (BANAT NEWS)