P4.9 milyones proyekto sa DOH gi-turnover sa Isla sa Olango
CEBU, Philippines — Gitinguha karon ni Mayor Junard Ahong Chan sa Dakbayan sa Lapu-Lapu nga mapalambo na ang Sta. Rosa Community Hospital sa Isla sa Olango ngadto na sa district hospital.
Si Chan nipadayag niini ngadto sa mga molupyo sa Isla sa Olango atol sa gipahigayong turnover ceremony sa emergency room ug cadaver holding area sa nilabayng adlaw.
Nikabat ngadto sa P4.9 milyones ang kantidad sa nahisgutang proyekto diin ang maong pundo naggikan sa panudlanan sa Department of Health (DOH)-7.
Ang DOH-7 nitugyan sa maong proyekto ngadto sa kagamhanan sa Dakbayan sa Lapu-Lapu ug gitugyan usab kini ni Chan ngadto kang Dr. Joel Simblante pangulo sa tambalan sa Isla sa Olango.
Dugang nga gipahibawo usab ni Chan ngadto sa mga molupyo sa maong isla ang libreng lungon ug libreng pagpalubong sa mga molupyo nga mamatay. BDB (BANATNEWS)
- Latest