Danao miisyu og EO kalabot sa videoke

CEBU, Philippines — Gidili na usab sa kagamhanan sa Dakbayan sa Danao ang pagpahigayon og videoke  tungod kay  makabalda kini sa mga molopyo ilabi na mga estudyante.

Kini nonot usab sa nadawat nga mga reklamo gikan sa mga molopyo kalabot sa nag-lanoglanog nga tingog sa videoke nga nakatugaw kaayo sa online classes, ingon man sa mga nagtrabaho diha sa ilang mga panimalay.

Giluwatan ni Danao City Mayor Ramon Durano III  ang Executive  Order nga nagmando  sa pag-ban sa karaoke ug videoke session sa maong dakbayan sa tibuok adlaw sa Domingo hangtod sa Huwebes.

Hinuon gitugot ang pagpahigayon og videoke sa alas 5 na sa hapon hangtod sa alas 10  ang takna sa gabii.

"There is a need to help and support those learners who are already having a hard time in adjusting to online classes and distance learning activities from home and having difficulty due to poor connection and to make their distance learning experience easier" pagbasa sa maong executive order.

Ang mga barangay officials ug ang ilang kaugalingong anti-coronavirus task force maoy gitahasan sa pagpatuman sa maong kamanduan. /MEL (BANATNEWS)