Traffic violators miabot og 14,544 sa buwan sa Oktubre
CEBU, Philippines — Moabot ngadto sa 14,544 ka traffic violators sa Dakbayan sa Sugbo ang naisyuhan og citation tickets sa buwan sa Oktubre. Niminos na kini kumpara sa kapin sa 18,000 ka violators niadtong Septiyembre.
Suma pa sa tigpamaba sa CCTO nga si John Paul Amores nga nalakip sa maong gidaghanon ang 996 ka mga sakyanan nga na-clamp tungod sa night illegal parking. Naka -impound usab ang CCTO og 672 ka motorsiklo sa susamang buwan.
Kasagaran sa ilang violations naglangkob sa walay rehistro, expired registration ug walay lisensya ug no delivery permit.
Dugang pa sa CCTO dunay uban nga motorista ang dili motuman sa signal sa traffic light kun diin usa sa resulta niini mao ang panagbangga sa mga sakyanan.
Sa gihimong operasyon sa CCTO niadtong Martes dili mominos sa 96 ka mga sakyanan ang na clamp diin ang maong operation gipahigayon diha sa may Sambag 1, Forest Hills Banawa, Good Shepherd Banawa, Salvador Street, Tisa, ug Labangon.
Gitug-an ni Amores, ang ilang operation gipahigayon base gihapon sa nadawat nga reklamo sa ilang buhatan.
Samtang daghan sa maong mga sakyanan ang balik-balik nga na clamp ug wala gayud motagam ang mga violators bisan og makabayad kini ug P1, 500 nga multa wa pay labot kun aduna silay pending nga mga violations. Rowena D. Capistrano (BANATNEWS)
- Latest