24 stalls nasunog
CEBU, Philippines — Dili mominos sa 24 ka mga stalls sa Unit II, Carbon Public Market, Barangay Ermita sa Dakbayan sa Sugbo ang nasunog sayo kagahapon sa kaadlawon adlaw nga Martes.
Ang sunog giingong nagsunog sa stall sa usa ka Chona Migo, ug nakontrolar kini paglabay lang sa pipila ka minutos.
Gibana-bana ni Fire Officer 2 Fulbert Navarro, Fire Investigator nga moabot ngadto sa P144 mil ang danyos sa maong sunog ug walay nasakitan sa insidente. Ang pangulo sa City Market sa siyudad Irvin Cabales, nitug-an nga dili mominos sa 14 ka stalls ang nakan-an sa kalayo ug 10 gyud ang naugdaw.
Ang siyudad mohatag og hinabang sa mga vendors nga naapektahan ug pangitaan sila og temporaryong pwesto.
Tungod niini si Cabales nakigtagbo kagahapon sa Cebu City Fire Office, Kapitan sa Barangay Ermita Mark Miral og OIC sa Cebu City Disaster Risk Reduction Management Office(CCDRRMO) Ramily Ayuman kay tinguha niini nga i-implementar ang mga probisyon sa Fire Code samtang dili pa ingon ana kadako ang danyos nga nahitabo.
Si SFO2 Romeo Birao, hepe sa plans and training sa Cebu City Fire Office miingon nakita nila nga daghan og dangling wires sa dapit, dili sakto ang pag install sa electrical connections. Decemay P. Padilla/IBM (BANATNEWS)
- Latest