Palma: Importante sa mga patay ang pag-ampo

CEBU, Philippines — Archbishop Jose Palma sa Archdiocese of Cebu subli nipahinumdum sa katawhan nga bisan ug sirado ang mga sam-ang ning panahon sa kalag-kalag padayonon lang gihapon ang pagdebosyon sa pag-ampo.

Matud pa sa arsobispo, angayan ipadayon gihapon ang practice ug pagdebosyon alang sa mga kalag sa mga kaigsuonan nga una nang nitaliwan ngadto sa laing kalibutan.

Nagkanayon si Palma nga angayang respitohan ang kamanduan sa Inter-Agency Task Force on Covid-19 ug sundon gihapon ang mga health protocols tungod kay nia pa ang coronavirus.  Gidasig ni Palma ang katawhan sa pagbisita sa mga parokya alang sa ilang pagpamisa alang sa mga patay tungod kay labing importante mao ang pag-ampo ug ang pagtuo nga gimahal nato sila ug gimahal usab sila sa Ginoo.

Samtang gidasig sa arsobispo ang mga magtuto nga mopaambit sa ilang kaigsuonan ilabi na kadtong adunay gi-andam nga pagkaon sa kalag-kalag tungod kay daghan ang gigutom karong panahona. /MEL (BANATNEWS)