Mga tanod nga nag-inom samtang nag-duty gisuspenso

CEBU, Philippines — Gisuspenso sa serbisyo ang upat ka barangay tanod sa Brgy. Tisa sa Dakbayan sa Sugbo tungod sa neglect of duty human sila nakuhaan og hulagway nga naginom diha sa control point sa karsada diin sila gipabantay.

Matud pa nga ang hepe sa mga tanod nga si  Nicolas Pacaña ug iyang mga sakop nga silang Albaro Cañete, Johannes Patiña ug  Japet del Rosario—gialegar nga miabandonar sa ilang trabaho aron magtagay.

Silang Pacaña, Del Rosario ug Cañete gisuspenso og 15 ka adlaw, samtang silang Patiña gisuspenso og 30 ka adlaw. Magsugod ang suspension karong adlawa.

Sumala pang Herty Lopez, ang chief of staff sa barangay, mas bug-at ang suspension ni Patiña kay siya maoy nakitang nagdala sa ilimnong makahubog samtang nag-uniporme pa ug oras sa trabaho.  Bisan paman sa hulagway nga gi-post sa netizen, gihimakak sa mga tanod ang pasangil kay matud nila kadtong hulagway didto nahitabo sa Cordova.

“They abandoned their posts and neglected their duty as barangay safety officers,” matud ni Lopez.

Sumala pa nga guilty ang mga tanod human sa gihimong imbestigasyon ni Barangay Captain Renato Pacaña ug Kagawad  Jong Alcazaren.—Gikan sa The Freeman/ IBM

34 dugang nangaayo sa Cebu City

Niabot na sa 2,433 ang recoveries sa Cebu City human nakatala ang siyudad og 34 ka additional reported recoveries base sa datos nga gipagawas sa Department of Health Central Visayas.

Pito sab ka bag-ong mga kaso ang natala sa siyudad nga sa pagkakaron niabot na sa 10,258 ang total case sa Covid-19 apan 147 lang ang active cases. Nagpabilin usab sa 678 ang deaths sa Cebu City.  Samtang ang Mandaue City nakatala og duha ka additional reported recoveries. Niabot na sa 2,558 ang total cases sa siyudad apan 70 lang ang active cases. Nakatala sab ang siyudad og tulo ka bag-ong kaso sa Covid-19 ug ang deaths nagpabilin sa 160.

Ang Lapu-Lapu City dunay 2,460 total cases sa Covid-19, human nakatala sila og usa ka bag-ong kaso sa virus, ang ilang aktibong kaso 125. Nagpabilin sab sa 2,232 ang recoveries ug 103 deaths sa dakbayan.

Sa datos sa DOH-7 ang Central Visayas dunay 22,390 total cases sa Covid-19 diin 927 ang active cases, 20,124 ang recoveries ug 1,339 ang recoveries. /IBM (BANATNEWS)