P34.2 milyones danyos sa produktong utanon ug prutas sa Cebu City

CEBU, Philippines — Nikabat ngadto sa P34.2 milyones ang danyos sa mga produktong utanon ug prutas sa Dakbayan sa Sugbo tungod sa sagunson nga ulan niining sa buwan sa Oktubre.

Matud ni Arlie Gesta, assistant head sa Cebu City Agriculture Department (CAD)   nga ang labing naapektohan mao ang 13 ka barangay sa siyudad  nga gilangkuban sa Adlaon , Babag, Bonbon, Malubog, Pung-ol Sibugay ,Paril, Sinsin, Sirao, Sudlon 1, Sudlon 2, Tabonan, Tagbao ug Taptap .

Nikabat usab ngadto sa 211 ka ektarya ang gilapdon sa lugar nga grabeng naapektohan tungod sa sagunson nga ulan.

Matud ni Gesta nga 283 ka mag-uuma ang apektado usab ug ang ilang buhatan padayon kini sa pagpahigayon og assessment aron masuta  ang klase sa  tabang nga mahatag sa kagamhanan sa siyudad ngadto sa mga naapektohan.

Sayo pa, ang CAD nidasig ngadto sa mga mag-uuma nga mo-apply sa Philippine Crop Insurance Corporation (PCIC) aron makabaton og libreng insurance alang sa ilang mga pananom.

Si City Agriculturist Joey Baclayon nagkanayon nga ang siyudad aduna na kini 1,700 ka mag-uuma nga na-enroll sa PCIC.

Dugang ni Baclayon nga ang CAD maoy nitabang sa pag-facilitate niini aron ma-enroll ang mag-uuma ngadto sa PCIC. /BDB (BANATNEWS)