Mga sam-ang sa Siyudad sa Sugbo malinawon

CEBU, Philippines — Kagahapon ang katapusang adlaw sa pagbisita sa mga sam-ang dinhi sa Siyudad sa Sugbo human nga sirad-an kini gikan sa Oktubre 29 hangtud sa Nobyiembre 4 isip kabahin sa lakang sa kagamhanan aron paglikay sa pagkatap sa coronavirus disease.

Usa sa labing daku nga sam-ang sa siyudad mao ang Calamba Cemetery, sa gawas pa lang sa maong sam-ang duna nay mga police nga nagbantay ug giabagan sab sila sa force multipliers.

Ang mga tawo nga mosulod sa menteryo, pangitaan og ID ingon man quarantine pass, kanunay sad nagpahinumdom ang mga nagbantay sa pagtuman sa minimum health protocols sama pagsul-ob og facemask ug social distancing.

Kagahapon sa buntag gibisita ni Konsehal Dave Tumulak ang Calamba Cemetery ug kini miingon nga sa pagsuroy-suroy niya sa mga sam-ang nakita niini nga hapsay ra ang sitwasyon. “Na control ra sa atong kapulisan, sa PROBE Team ug sa disaster ang pagbantay sa atoang mga menteryo diri sa Siyudad sa Sugbo”, ni Konsehal Tumulak pa.

Si Janine Flor Paylado, kinsa miduaw sa iyang amahan ug uyuan nga naa gilubong sa menteryo sa Calamba miingon nga nisayo sila og adto sa sam-ang aron makalikay sa daghang tawo apan kini mitataw nga lahi ra ang sitwasyon karon itandi sa nanglabay nga katuigan nga daghang suga ug daghang tawo.

Samtang gipakatap sa Dakbayan sa Danao ang 95 ka mga personnel nga gitahasan sa pagbantay sa mga sam-ang panahon sa kalagkalag.  Lakip sa gipakatap ang 40 ka mga polis, napulo ka mga sakop sa Bureau of Fire Protection (BFP) 20 ka mga sakop sa Traffic Management Office ug 25 usab ka sakop sa Barangay Public Safety Officer (BPSO) alang sa pagpatuman sa kahapsay ug kalinaw. Romeo T. Limpangog/MEL (BANATNEWS)